LEGAZPI CITY—Nakumpiskar an 55 sako nin bako dokumentadong ukay-ukay kan mga personahes kan Coast Guard Station Sorsogon sa Matnog port sa provincia kan Sorsogon.
Segun ki Coast Guard Station Sorsogon Acting Public Information Officer Ensign Edison Bobis, sa intrevista kan Bombo Radyo Legazpi, nadiskubre ninda an mga kaduda-dudang nakabugkos na mga sako gikan sa sarong truck huli sa ikinundusir na routine inspection kan saindang ahensya sa nasambitang pantalan.
Sa presente pighahalat pa ninda an report gikan sa Bureau of Customs sa kun gurano an kantidad kan mga nakumpiskar na ukay-ukay.
Napag-araman na gikan an wing-van truck sa Pasig City asin pasiring kuta nang Calbayog, Samar.
Dugang ni Bobis na an mga nakumpiskar na mga ukay-ukay yaon na sa Bureau of Customs.
Mientrastanto, pagiromdom kan opisyal sa publiko na mahigot na ipinagbabawal an pag-angkat nin segunda-manong bado siring kan ukay-ukay sa Pilipinas huli ta nakabugtak ini sa Acta Republika numerado 4653 o an “Act Prohibiting the Commercial Importation of Textile Articles Commonly Known as Used Clothing and Rags.”
