LEGAZPI CITY- Nagpapadagos an koordinasyon kan mga ahensya de gobierno sa rehiyong Bicol para sa pagkokundusir nin random drug testing sa mga terminals sa rehiyon.
Ini an katakod kan propuesto na magkaigwa nin regular na drug test sa mga drivers kan mga public utility vehicles huli sa magkakasunod na mga aksidente na nangyayari sa nacion.
Segun ki Land Transportation Franchising and Regulatory Board Bicol Director Joel Defeo sa intrevista kan Bombo Radyo Legazpi na nakikipag koordinar na an saindang lado sa Land Transportation Office asin Philippine Drug Enforcement Agency.
Paliwanag kan opisyal na ngunyan na pinag-aantisiparan an pagbulos kan dakol na mga pasahero huli sa paparaning pirilian, magkokundusir man an ahensya nin serye nin mga drug test sa mga drivers.
Obheto kaini na masierto an seguridad kan mga pasahero asin maasegurar na salbado asin convenient an transport system.
Segun ki Defeo na an ibang nagpo-positibo sa drug test an nagdedepensar na nagagamit kan iligal na droga ngani na dae mangiturog mantang an iba man an bisyo na.
Dugang pa kan opisyal na kinakaipuhan na simbagon man kan mga operators an gastos sa pagpapa drug test kan saindang mga drivers.
