LEGAZPI CITY—Matrayumpong nasakyada kan mga otoridad an duwang drug den asin ikinaarestar kan pitong drug personalities na gabos pigkonsiderar na high-value target sa magkasunod na buy-bust operation sa Barangay Oro Site, Legazpi City.
Enot na nasakyada an sarong drug den asin naarestar an mga suspek na si alyas “Ai”, an pigtutubudang drug den maintainer; alyas “Son”, drug den employee; magin sinda alyas “Ry” asin alyas “Ollie” na parehong bisita kan nasabing drug den.
Nakumpiskar digdi an pocomas o menos 10.10 gramos nin pigtutubudang shabu na may standard drug price na P68,060, kabale an buy-bust money, boodle money, drug paraphernalia asin iba pang non-drug items.
Afuera digdi nasakyada man sa kaparehong barangay an ikaduwang drug den kun sain naarestar an tulong indibidwal na binistong sinda alyas “Lita”, an drug den maintainer; alyas “Ger,” drug den employee; asin alyas “Rody, na bisita kan naunambitang drug den.
Durante kan operasyon nakumpiskar an nasa 15 gramos nin pigtutubudang shabu na nagkakantidad nin P102,000, kabale an buy-bust money, drug paraphernalia, asin iba pang non-drug items.
Ginibo an operasyon sa pinagsarong operatiba kan Philippine Drug Enforcement Agency Albay Provincial Office, PDEA Regional Office 5 Regional Special Enforcement Teams 1 and 2, PDEA RO5 Intelligence and Investigation Section, Legazpi City Police Station, Regional Maritime Unit 5 (PNP), asin Philippine Coast Guard Intelligence Unit-Albay.
Mientrastanto, nahahampang an mga nasabing suspek sa kasong pagbalgar sa Sections 5, 6, 7, 11, 12, 15, Article II kan Republic Act 9165, o Comprehensive Dangerous Drugs Act of 2002.
