LEGAZPI CITY – Preparado na an mga kapulisan sa Jovellar, Albay pirang aldaw antes an 2025 Midterm Election.
Segun ki Jovellar Municipal Police Station Chief of Police, Police Captain Rufino Casagan sa intrevista kan Bombo Radyo Legazpi na matalima sinda sa kasuguan ni Philippine National Police Chief Marbil na masyerto an seguridad asin katuninongan sa saindang banwaan sa panahon nin pirilian.
Nasa 100 man na personel an idedeploy na kompwesto kan kapulisan, Philippine Army, asin iba pang law enforcement agency.
Padagos man an serye nin mga training mga kapulisan na idedeploy sa manlain-laing presinto asin barangay sa saindang lugar nganing ma-asigurar an mga kahandaan kaini.
Mawot man kan nasabing opisyal na magbugtak nin mga pulis sa mga hararayo asin nasa kabuludang parte kan Jovellar nganing magkaigwa nin presensya kan saindang tropa sa mga presinto.
Sa hiling niya man, supisyente man an numero kan saindang ipigdeploy asin dae na kaipuhan nin augmentation hale sa Albay Police Provincial Office.
Sa presente, nagtetenir suboot na trangkilo an saindang banwaan pirang aldaw antes an pirilian maski an mga partido asin kandidatong maglalaban sa manlain-laing local position.
Sa ibong kaini, pighayag ni Casagan na mantinidong alerto an saindang opisina huli ta dae man suboot mawawara an mga posibleng huma na maruluwasan tuyong aldaw nin eleksyon.
