LEGAZPI CITY – Pighayag kan Bureau of Fire Protection Sorsogon Provincial Office na patapos na an mga pigsasagibong clearing operation sa mga banwaan na naapektaran kan pag-aalburuto kan bulkang bulusan.
Segun ki Bureau of Fire Protection Sorsogon Provincial Office Public Information Officer Fire Officer 3 Kristine Ducay sa intrevista kan Bombo Radyo Legazpi na inabot man nin pirang oras an mga flushing activity asin passable na an mga naapektarang kakalsadahan huli sa ashfall.
Susog man sa saindang isinagibong assessment, mas nahaluyan an isinagibo nindang flushing operation sa ikaduwang ashfall na nangyari kompara kan naenot huli sa dakol na ibinuga kan nasabing bulkan.
Sa katunayan suboot, tulos na naka-deploy an saindang mga personahes asin mga fire truck nganing marikas an pagsasagibo nin clearing operation.
Pigtaram pa kan opisyal na wara man nin patod an pagbabarewas ninda nin malinig na tubig sa provincia partikulamente na an mga nasa evacuation center.
Pig-asigurar niya man na may bastanteng pagkukuwaan sinda nin malinig na tubig sa ibong kan padagos na aktibidad kan Bulkang Bulusan.
Abiso ni Ducay sa publiko na permihang magsulot nin facemask enkaso maluwas sa saindang mga harong asin magsunod tulos sa mga otoridad kun kinaipuhang mag-ebakwar.
