LEGAZPI CITY- Duda an grupo nin mga paraoma na maaarog sana sa ibang bako makabuluhan na programa an pagpapaotob nin P20 kada kilo na bagas sa Visayas.
Segun ki Bantay Bigas Spokesperson Cathy Estavillo sa intrevista kan Bombo Radyo Legazpi na posibleng pampa-pogi sana an lakdang sa maabot na eleksyon.
Ini an ngani na mapakusog an imahe kan Marcos administration kasunod kan hibabang rating kaini.
Kinuwestyon kan grupo kun nata sa panahon kan eleksyon ipapaotob an nasabing lakdang maski pa enot ng sinabi kan administrasyon na dae kayang ipaotob an P20 kada kilo nin bagas.
Dugang pa kan opisyal na bako sana dapat sa Visayas magpabakal nin baratong bagas kundi sa bilog na nacion huli ta gabos na mga
Pilipino an nagmamawot man nin hibabang presyo.
Segun pa ki Estavillo na maikokunsiderar na politically motivated an nasabing lakdang asin nagtutubod an grupo na dae mahaloy an durasyon kan implementasyon kaini.
