LEGAZPI CITY—Pighayag kan Ligao City Police Station na nagin matoninong an pag-obserbar kan enterong durasyon kan Semana Santa sa nasabing ciudad.
Segun ki Ligao City Police Station Chief of Police, Police Lieutenant Colonel Herminio Olivares, sa intrevista kan Bombo Radyo Legazpi, na wara sindang nanotaran na ano man na krimen asin nagin matoninong an pag-obserbar kan Semana Santa partikularmente na kan pasagibo nin prusisyon kan Biyernes Santo.
Namantenir suboot an matoninong na pag-obserbar kaini sa tabang na man kan saindang mga personahes asin mga opisyales kan barangay.
Sinabi ni Olivares, saro sa saindang binantayan an Maharlika Highway asin an mga pig-aapod na places of convergence partikular na an mga Simbahan sa ciudad.
Kinaolay man kan saindang opisina an mga barangay na magtabang sa pagpapatrolya urog na pagkabanggi.
Dugang pa kaini na wara man sindang nairehistrong nalamos o nadisgrasya durante kan Domingo nin Pagkabuhay.
