LEGAZPI CITY – Dae pighahale kan Philippine Institute of Volcanology and Seismology an posibilidad na magkaigwa nin phreatic eruption an Mayon Volcano.
Segun kay Mayon Observatory Resident Volcanologist Deborah Fernandez sa intrevista kan Bombo Radyo Legazpi na base sa saindang 24 oras na pagbabantay an warang nairehistrong volcanic earthquakes asin rockfall events.
Poon pa kan Abril 1 an aldawang nakakapagrehistro nin 337 tons na sulfur dioxide flux asin an steaming activity an nagtetenir sa katamtaman asin pigtatalyap sa west southwest asin southwest part kan bulkan.
Naaaninag man an crater glow o banaag tuyong banggi sa paagi kan saindang IT Camera.
Pigtaram pa kan volcanologist na nakabandera man giraray an alert level 1 kun kaya mantinidong ipinagbabawal an paglaog sa 6km permanent danger zone.
Nagtetenir sa nasabing alert level an bulkan huli ta dae man ninda pighahale an posibilidad na magkaigwa nin rockfall hale sa dalisdis kaini na delikado sa publiko.
Pighihiling man kan Phivolcs an paghuhubag kan bulkan huli ta basado sa saindang ground deformation monitoring na may nahihiling na mga short-term inflation sa manlain-laing parte kaini.
Pagirumdom ni Fernandez sa mga naka-istar harani sa mga river channels kan Bulkan an mag-ingat sa huma kan lahar flow partikulamente na kun mauran an satuyang panahon.
