LEGAZPI CITY—Ipighayag kan ‘Atin Ito’ coalition na nakatalaan nindang isagibo an ikatulong civilian mission sa West Philippine Sea (WPS) sa Mayo 25, 2025.
Magigiromdoman na kan Disyembre 2023 matrayumpo sindang nakapagtao nin mga regalo sa mga frontliners sa bisinidad kan Ayungin Shoal, mantang kan Mayo 2024 nakapagdara sinda nin food packs asin iba pang mga tabang sa mga parasisira sa bisinidad kan Scarborough Shoal.
Segun ki Atin Ito Coalition Convenor Rafaela David, sa intrevista kan Bombo Radyo Legazpi, magkakaigwa nin peace and solidarity concert sa West Philippine Sea nganing ipahiling na sarong peace zone an WPS.
Sinabi kaini na concierto an saindang napili huli ta ginamit ninda an kapangyarihan kan musika, art, asin collective actions sa pagdepensa kun ano an karapatan kan nacion.
Dugang kaini na an saindang grupo nagtutubod na kayang manindugan kontra sa China sa sarong matoninong na paagi.
Naglalaom man sinda na maengganyar an maabot sa 100 na civilian volunteers na gikan sa Pilipinas siring man an mga artists asin parasisira sa ibang nacion na magpartisipar sa aktibidad ngani mapahiling na an isyu sa WPS, bako sana isyu kan Pilipinas kundi kan ibang nacion na naaagrabyado kan China asin nagtutubod na dapat ining magsunod sa mga international laws.
Nagkapira sa mga mapartisipar sa naunambitang aktibidad sinda Noel Cabangon, all-female rock band na Rouge Band asin sarong Japanese artist.
Mientrastanto, sinabi ni David na padagos na ipaglalaban kan saindang grupo an West Philippine Sea.
 on May 25, 2025.){kind=link}