Inuran nin apela an Facebook page kan Philippine Embassy in The Netherlands, kasunod kan dagos na pagbiyahe kay dating Pres. Rodrigo Duterte pasiring sa The Hague.
Enot na kayang iniluwas kan embahada an sarong statement na naghatod ini nin counselor assistance sa dating presidente pag-abot niya sa nasambitang nacion, kabale na an pagtatao nin mga winter clothing, health care package, atbpa.
Kadaklan sa mga supporter kan dating lider kan nacion an nagpadara nin mensahe sa embahada asin nagmamawot na tabangan an dating presidente sa saiyang mga pangangaipuhan.
Pira sa sainda an nagmamawot na itao sa dating presidente an respeto asin paggalang na nararapat asin akma sa sarong nagsirbing presidente.
Pirang mga supporter man an umapela sa embahada na magin ‘fair’ asin dae pairalon an political color sa pagtrato sa dating presidente.
Kasuhapon, Marso 12 an kadakol nang mga Pilipino an nagpasiring sa ICC headquarters sa The Hague nganing subaybayan an pag-abot kan dating presidente.
An pira sa sainda an nagdara nin mga tarpaulin kun saen nakasurat an saindang pagrumdom asin pagkamoot sa dating presidente.
Enot na mang kinumpirmar kan embahada kan Pilipinas na nag-abot an eroplanong pigsasakayan kan dating lider kan nacion sa Rotterdam Airport.
Pag-abot ni Ex Pres. Duterte , dagos siyang ipinasakamot sa Judicial Cooperation Unit kan Office of Registry kan International Criminal Court (ICC).
