Legzpi City- Matrayumpong nasakote kan pinagsarong operasyon kan Philippine Drug Enforcement Agency (PDEA) Masbate Provincial Office, Mobo Municipal Police Station (MPS), asin kan Philippine Coast Guard (PCG) Mobo Substation makalihis na makapagkumpiskar nin maabot sa 75 grams nin Shabu sa Mobo Port kan Probinsya nin Masbate.
Sa intrevista kan Bombo Radyo Legazpi kay Carlo Fernandez, PIO, PDEA Bicol, sa pagsasagibo nin regular na inspeksyon kan mga otoridad sa Mobo Port sa paagi man kan SIU-K9 inspection. Nadetect kan K9 dogs an presensya kan iligal na droga sa sarong bus na nagbabyahe sa naunambitang pantalan.
Maabot man sa 14 na sachet nin pinagtutubudang shabu an nakumpirskar na kun sain pinagkakarkulong nagkakantidad ini nin P262, 500. Base man sa impormasyon pinasabay sana suboot hale sa Albay an bagahe pasiring sa pantalan hasta sa masabat kan mga otoridad sa naunambitang bagahe. Nagiging padipisilan man an pag-aaram sa mga embwelto sa pagpapadara kan illegal na droga huli sa dae man pinasabay sana an bagahe asin dae na man nagbutwa an makua kan bagahe sa Mobo.
Sa presente padagos pa man an imbistigasyon na isinasagibo kan mga otoridad para sa pag-aaram sa mga embwelto sa naunambitang pagpapadara nin iligal na droga. Nangapudan man an opisyal nin pakikipagtarabangan kan komunidad para sa mga padagos pang nagpapalakop nin iligal na droga sa probinsya.
