750 kilo nin kemikal na cyanide nasabat kan mga otoridad sa ciudad kan Masbate

LEGAZPI CITY- Nasabat kan mga otoridad an sarong truck sa National Highway, Crossing St., cuidad kan Masbate na may kargang kemikal na cyanide.
Segun sa impormasyon na ipinaabot kan mga otoridad, saro ng concerned citizen an nag-tip sa mga otoridad dapit sa iligal na pagbiyahe kan nasambitan na kemikal.
Huli digdi, tulos na nagresponde sa lugar an pinagsarong pwersa kan Masbate City Police Station, Police Intelligence Branch, asin DENR Masbate sa pangengenot ni Police Chief Inspector Gerardo Balatucan kun sain naharang an 15 canisters nin cyanide.
Napag-araman na uminabot ini sa 750 kilograms na hali pa sa Metro Manila na pasiring kuta sa banwaan kan Aroroy, Masbate.
Wara man na naipresentar na dokumento an driver kan nasambitan na truck kun kaya nakumpiskar ini.
An cyanide an sarong peligrosong kemikal para sa salud huli ta pinagpupugulan kaini an cells na magamit nin oxygen na kalaunan an nagigin rason kan pagkagadan kan mga cells sa hawak.