LEGAZPI CITY — Dakop an limang kalalakihan kasabay na an apat na estudyante sa isinagibong anti-illegal durgs operation kan mga personahes kan Sorsogon City Police sa Barangay Almendras-Cogon.
Sa ipinaabot na impormasyon, sarong concerned citizen an nagtimbre sa mga otoridad dapit sa pigkokondusir na pot session sa sarong boarding house sa nasabing lugar.
Kan maberipika an impormasyon, sinugod na kan pinagsarong pwersa kan Sorsogon City Police sa pamamayo ni PS/Insp. Romeo Triñanes Rocio Jr asin Provincial Drug Enforcement Agency na pinangenotan man ni Atty. Alex Fulgencio an nasabing boarding house na pagsadiri kan sarong Rosario Bolaños Cadag.
Digdi na naaktuhan na naggamit nin pigsususpetsarang marijuana sinda Jasper Samonte, 18 anyos, nasa second year college; Roy Mercadero, 20 anyos; France Sanchez, 18 anyos, estudyante sa high school; Jhamer Lagamayo, 18 anyos, estudyante; asin sarong 17 anyos na sarong grade 9 student.
Narekober sa harong an pigsususpetsarang mga pinamarang dahon nin marijuana asin mga drug paraphernalia na nasa pag-ataman na kan Sorsogon CPS siring man an mga suspek na isasairarom sa laboratory, medical asin physical examination.
Sa ngunyan, pighahanda na an kasong pagbalgar sa Republic Act 9165 o an Comprehensive Dangerous Drugs Act of 2002 na isasangat laban sa mga suspetsado.
