Ibinuyagyag ni Commission on Elections (COMELEC) Chairman George Erwin Garcia na tulo sa top 15 project contractors na nasabi ni Presidente Ferdinand Marcos Jr. an kaiba suboot sa mga nagtao nin donasyon sa kampanya kan pirang kandidato kan 2022 elections.
Segun ki Garcia, an tulong kumpanyang ini—na dae pa pinangaranan—an kaiba sa listahan kan 31 contractors na presenteg pig-imbestigaran kan COMELEC katabang an saindang Political Finance and Affairs Department (PFAD).
Segun pa ki Garcia, kaiba man sa saindang iimbestigaran an mga service contractors asin dae sana masentro sa private o government contractors.
Dugang pa ni Garcia ipapadara kan poll body an nasabing listahan kaiba an saindang mga inisyal na imbestigasyon sa Kamara bilang parte kan saindang pigsasagibong pagbusisi nganing masierto an transparency asin integridad sa mga proyekto asin kontrata kan gobierno.
Kaiba sa mga dokumentong ini an kantidad kan itinao kan kontratista sa kandidato asin kun sisay na mga kandidato an tinawan nin pondo.
Magigiromdomang ibinuyagyag ni Presidente Ferdinand Marcos Jr., na an P100 bilyon gikan sa kabilogang P545 bilyon na pondo para sa flood mitigation projects kan Hulyo 2022 sagkod Mayo 2025 an na-award sana sa 15 contractors gikan sa 2,409 accredited contractors.
Kaiba sa 15 na ini an kumpanya ni Lawrence Lubiano na Centerways Construction and Development Incorporated na nakumpirmang nag-donate ng 30M para sa pangangampanya ni Senate President Francis ‘Chiz’ Escudero kan 2022 elections.
