LEGAZPI CITY – Karsel an bagsak kan tulong persona makalihis na makuwaan nin P170,000 na kantidad kan ilegal na droga sa isinagibong buybust operation sa Brgy Tula-Tula, Legazpi City.
Segun ki Legazpi City Police Station spokesperson Police Executive Master Sergeant Carlos Paña sa intrevista kan Bombo Radyo Legazpi na isinagibo an operasyon sa pinagsanib na pwersa kan Legazpi CPS, Philippine Drug Enforcement Agency Albay Provincial Office asin PDEA Regional Office 5.
Minidbid an mga suspetsado na sinda alyas “Tin”, 33 anyos, negosyante asin residente kan Barangay Cruzada Legazpi City; alyas “June”, 37 anyos, warang agom asin residente kan Barangay Cabangan kan parehong ciudad; asin si alyas “Long”, 40 anyos, may agom asin residente kan Barangay Rawis kan parehong ciudad.
Narekober hale sa sainda an tulong heat-sealed transparent plastic sachets na may laog kan pigtutubudang shabu na may timbang na pigkakarkulong sa 15 gramo na may estimated street value na P102,000.
Pigtaram pa kan opisyal na mantang pigsasagibo an pagrerekisa sa mga suspetsado, nakuwa giraray an sarong pang heat-sealed transparent plastic sachet na may laog kan pigtutubudang shabu asin pigkakarkulong 5 gramos na may kantidad na P34,000 hale kay alyas “Tin” , 3 gramo na shabu man na nagkakantidad nin P20,400 kay alyas June asin 2 gramo kan pigtutubudang shabu na nagkakantidad na P13,600 hale kay alyas “Long”.
Dakulang bagay suboot an pagkakadakop sa mga suspetsado nganing dae na magdakol an mabibiktima kan mga ini.
Sa presente, nagtetenir sa kustodiya kan Legazpi CPS an mga suspetsado para sa magkakanigong disposiyon.
Pangapodan ni Paña sa mga naggagamit nin ilegal na droga na punduhon na an saindang paggamit huli ta dae man nagpupundo an mga otoridad sa pagdakop sa sainda.
