LEGAZPI CITY—Arestado an duwang indibidwal sa giinibong operasyon kan Tabaco City Police Station sa Brgy. Balintawak, Lipa City, Batangas.
Segun ki Tabaco City Police Station Officer in Charge Police Lieutenant Colonel Virgil Bibat, sa intrevista kan Bombo Radyo Legazpi, naarestar an duwang suspek makalihis an inisyu na Warrant of Arrest kan Tabaco City Regional Trial Court Branch 15 sa pagbalgar sa Section 121 kan Republic Act No. 10654 o Philippine Fisheries Code na may pigrekomendang piyansa na P20,000 kada saro.
An mga suspek an may edad na 65-anyos asin 53-anyos.
Mientrastanto, naarestar man ninda an saro pang inidbidwal na pigkonsiderar na Top 10 City Most Wanted Person sa kasong frustrated murder sa Brgy. Malpitic, San Fernando, Pampanga kun sain may pigrekomendang piyansa na P200,000.
Segun sa opisyal na haloy man na pinaghahanap an 52-anyos na suspek kun sain kan naaraman kaini an saiyang kaso sa ciudad an tuminago na ini sa Pampanga.
Sa presente nasa kustodiya na kan Tabaco CPS an tulong indibidwal para sa magkakanigong disposisyon.
