LEGAZPI CITY- Duwang lalaki an naposasan kan mga otoridad huli sa iligal na pagbyahe nin mga coco lumber.
Dakop an mga suspek na sinda Edmundo Rey Rodrigo, 49-anyos asin Christian Olivarez, 20-anyos na parehong residente kan Barangay Barayong, syudad kan Ligao.
Susog sa report kan Ligao City Police Station, sarong concerned citizen an nagpaabot sainda kan impormasyon na sarong tricycle o kabal-kabal an nagbabyahe nin iligal na lumber.
Tulos na nagpasiring sa lugar an pulisya sa pangengenotan ni SPO1 Willy Regondola asin inarestar an mga suspek.
Nakumpiskar sa posisyon kan mga ini an 17 pidaso nin coco lumber asin 10 pidaso nin coconut bark.
Nasa kustodiya na ini ngunyan kan nasambitan na pulisya para sa magkakanigong disposisyon.
