Kinondena kan mga world leaders an ginibong pag-atake kan Israel sa sarong eskwelahan sa Gaza na ikinagadan nin 93 na katawo.
Segun kay European Union’s foreign policy chief Josep Borrell, makahandal an nangyayari sa Gaza lalo pang kadakol na mga joven asin kababaihan an nagadan sa insidente.
Para man sa French foreign ministry, dapat na irespeto kan Israel an international humanitarian law asin pundohon na an pag-atake sa mga eskwelahan na nagseserbi ngunyan na dulagan kan mga sibilyan.
Para man kay United States National Security Council spokesman Sean Savett, dae nagpundo an saindang gobyerno sa pangapudan sa Israel na mapangataman an buhay asin seguridad kan mga sibilyan.
Duda man an Jordan foreign ministry sa timing kan pag-atake kan Israel na mawot sana suboot na mapugolan an pigbubusol na ceasefire.
Mientras tanto, nangapudan an gobyerno kan Qatar na mapaimbestigaran kan international court an insidente lalo pang kadakol an mga biktimang nagadan.
Magigirumduman na sa nasabing aldaw bako sanang an eskwelahan an binomba kan Israel alagad maging an Al-Nuseirat, Deir Al-Balah asin Rafah kung sain pitong katawo pa an nagadan.
