LEGAZPI CITY-Piglinaw kan sarong Weather specialist na epekto na kan localized thunderstorms an nae-eksperyensyahan kan Bicol Region.
Segun kay Weather Specialist Jaime Bordales, sa intrevista kan Bombo Radyo Legazpi na an pag-uuran sa Albay patikular na sa Legazpi, bako na epekto kan bagyo sa laog kan Philippine Area of Responsibility (PAR).
Ini an pig-aapod na localized thunderstorms, na makukusog na pag-uuran na igwang kaibang pagkidlat asin pagdaguldol asin dai naghahaloy kundi nasa maximum 2 hours sana.
Alagad sinabi kan opisyal na mag-ingat man liwat sa posibleng mga pagbabaha asin pagrasay nin daga.
Mientras tanto, an pinagbabantayang bagyo na si Tropical Depression Luis nasa coastal waters na kan Divilacan, Isabela asin naghihiro pasiring sa Northwestward sa rikas na km/h.
May kusog an parus kaini na nasa 45 km/h harani sa sentro asin pagbugso na nasa 60 km/h.
Sa kabilugan, warang epekto an bagyo sa Bicol Region asin laoman sana an maluluya sagkod moderatong pag-uuran.
Sa kadagatan, laoman man an banayad sagkod moderatong pag-hukol, asin mag-aabot naman an temperatura sa rehiyon sa pinakahababang 25 degree celsius asin pinakahalangkaw na an 33degree celsius.
Sinabi man ni Bordales na an mga localized thunderstorms an default weather kan Pilipinas enkaso warang aktibong weathe system.
An mga localized thunderstorms nabibilog suboot poon udto hasta hapon huli sa rapid evaporation dara kan matinding init kan saldang na nagdadara nin pag-uuran bandang hapon sundong banggi.
Sa presente, afuera kay Luis, igwang aktibong bagyo sa luwas kan PAR alagad dai man pinaglalaoman na maglaog sa area of responsibility kan Pilipinas.
Mientras tanto, laoman man an 2-3 na bagyo sa bulan kan Agosto bilang parte pa ini kan tropical cyclone season poon sa bulan kan Hulyo.
