LEGAZPI CITY – Pigkokonsidera kan Commission on Elections Bicol na generally peaceful an enterong durasyon kan voters registration sa rehiyon.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na sa enterong paninirbihan niya, ini an pinakamatrayumpo asin matuninong na registration period huli sa ipinahiling na determinasyon kan mga jovenes na makapagparehistro.
Maski suboot halaban an nagin pila sa mga registration area an mga mauugma man giraray an mga kaakian huli ta barkadahan an saindang nagin estilo nganing dae ma-boring sa pila.
Padagos man giraray an saindang trabaho ngonian na aldaw maski inabot ki alas tres bago sinda makauli sa kaniya-kaniya nindang harong nganing magpahingalo.
Naghagad man nin dispensa an opisyal huli sa posibleng saro o duwang personahes sana an tawo sa saindang ofisina asin naghagad nin pirang oras nganing maibalik sa normal an saindang operasyon.
Enkaso suboot na makansela an Barangay and Sangguniang Kabataan Elections sa disyembre an nakatalaan sindang magsagibo liwat nin voters registration sa huring semana kan Oktubre.
Nagpromesa man siya na makansela an botohan an dudumanan ninda an mga barangay asin mga eskwelahan nganing magsagibo nin registration.
Nagpasalamat man si Valeza sa mga manlain-laing law enforcement agency, Gobierno lokal, mga SK and Barangay Officials, mga magurang asin jovenes huli sa pakikipagtabangan asin pakikisumaro sa voters registration ngonian na taon.
