Naglobo pa an kabilogang utang kan gobierno kan Pilipinas sa P18.55 trilyon sa katapusan kan Mayo 2026, segun sa pinakahuring report kan Bureau of the Treasury (BTr).
Nagsakat ini nin 0.41% o dagdag na P76.1 bilyon kumpara sa P18.47 trilyon na nairehistro kan katapusan kan Abril 2026.
An pangenot na rason kan paglobo kan utang an huli kan mas agresibong pagsasagibo nin domestic borrowings o pag-isyu nin mga government securities nganing tawan nin pondo an mga programa kan estado sa ibong kan pabago-bagong hiro kan merkado kawsa kan tensyon sa Middle East.
Kadaklan kan utang kan nacion o pocomas o menos 68% hanggang 70% an domestic o gikan sa laog kan nacion siring kan mga lokal na bangko asin mamumuhunan, mantang an natatada an external o utang sa ibang nacion.
Mantang padagos na naglalangkaw an utang asin piglalaomang malagpas sa P19 trilyon sa katapusan kan 2026, nanindugan an BTr na kaya ining bayadan o manageable huli sa pag-uswag kan ekonomiya.
