Nagpasiring sa Kyiv an mga representante kan Estados Unidos na sinda Jared Kushner asin Steve Witkoff ngani na makipag-olay ki Ukrainian President Volodymyr Zelenskyy dapit sa pagpapaundo kan giyera sa pagultangan kan Ukraine asin Russia.
Nangyari an historikal na meeting kan Domingo makalihis munang makipaghilingan an duwang opisyal ki Russian President Vladimir Putin sa Moscow kan Sabado.
Nagpaabot nin pasasalamat si Zelenskyy sa pag-abot kan delegasyon kan US asin tinawan duon an importansya kan paggibo kan gabos na paagi ngani na dagos na matapos an giyera.
Isinaladawan ni Witkoff na magayon asin makabuluhan an nagin pag-oolay mantang sinabi man ni Kushner na obheto ni US President Donald Trump na makabilog nin tamang kondisyon para sa panghaluyan na katrangkiluhan.
Nag-atendir man sa ika-duwang parte kan meeting an mga national security adviser hali sa United Kingdom, France, asin Germany ngani na magpahiling nin suporta sa Ukraine.
Sa ibong kan panandalian na pagpundo kan mga pag-atake sa kabisera para sa nasabing bisita, nagpapadagos man liwat an sagupaan asin ribayan nin mga drone attack sa iba pang parte kan nacion.
