LEGAZPI CITY-Nagpasiring sa Kyiv an mga kinatawan kan Estados Unidos na sina Jared Kushner asin Steve Witkoff ngani makipag-olay kay Ukrainian President Volodymyr Zelenskyy mapadapit sa pagpapapundo sa gera sa pagultanan kan Ukraine asin Russia.
Nangyari an makasaysayan na pagtiripon kan Domingo pagkatapos na an duwang opisyal makipag-olay ki Russian President Vladimir Putin sa Moscow kan Sabado.
Pinasalamatan ni Zelenskyy an delegasyon kan Estados Unidos sa saindang presensya asin pigduon an importansya kan paggibo kan gabos na posibilidad nganing matapos an nagpapadagos na gera.
Ilinadawan ni Witkoff an mga diskusyon bilang positibo asin makahulugan, mantang sinabi ni Kushner na an katuyuhan ni U.S. President Donald Trump, iyo an magmukna nin tamang kondisyon para sa katoninongan.
An mga national security adviser gikan sa United Kingdom, France asin Alemania, nag-atendir man sa ikaduwang parte kan pagtiripon sa pambansang kabisera nganing ipahiling an suporta sa Ukraine.
Sa ibong kan halipot na pagpundo sa mga pag’atake sa mga kabisera para sa bisita, an mga bakbakan asin mga drone attacks, nagpadagos sa ibang parte kan duwang nacion.
