LEGAZPI CITY – Triple an ipiglangkaw sa unemployment rate sa Bicol huli sa COVID-19 pandemic, susog sa datos na kapot kan Department of Labor and Employment (DOLE) regional office.
Sa intrevista kan Bombo Radyo Legazpi ki DOLE Bicol Regional Director Joel Gonzales, base sa comparison kan datos nag-double digit an unemployment rate sa katahawan kan nakalihis na taon.
Puon kaya sa 4.8% rate o labi sa 126, 000 unemployed workers kan 2019, nagsakat ini sa 15.7% o 344, 000 na trabahante na nawaran nin trabaho hasta sa second quarter kan 2020.
Alagad naglalaom an opisyal na igwa pang pagbabago sa nasabing datos urog na dai pa kasabay digdi an second semester kan nagtalikod na taon.
Naglalaom si Gonzales na magkaigwa nin pagrahay-rahay sa datos huli ta may mga establisyemento naman na paramientras na nagsarado alagad nagbalik na ngunyan sa operasyon.
Mayor na rason na pighihiling kan ahensya sa nangyari an ipinaotob na lockdown huli sa paghadit sa bagong virus.
Mientras tanto, nag-ofrecer man nin financial assistance an ahensya sa mga apektado sa paagi kan mga programang DOLE CAMP sa mga nawaran nin trabaho sa formal sector; DOLE TUPAD sa informal workers; DOLE AKAP sa mga OFW asin Tabang sa OFW bilang educational support sa mga dependents kan OFWs.
