LEGAZPI CITY—Nagtapos bilang Valedictorian kan Philippine Merchant Marine Academy Salighirang Class of 2026 an 25-anyos na gikan sa Gogon Caraycayon, Tigaon, Camarines Sur si Midshipman First Class Mark Owen S. Trilles sa ginibong commencement exercises sa Zambales kan Hulyo 17.
Segun ki Trilles, sa intrevista kan Bombo Radyo Legazpi, na na-inspire siya na maglaog sa PMMA huli kan saiyang ama na naggradwar man digdi.
Pigkonsiderar niya suboot na sarong “blessing in disguise” an duwang beses na dae siya natanggap sa PMMA; nag-adal muna siya nin marine engineering asin nag-focus sa academic asin training aspect na nagin kawsa nganing dagos na makalaog siya sa PMMA.
Dugang kaini na kinakaipuihan an pagsasakripisyo o boot-sabihon na maski may mga okasyon sa luwas an kinakaipuhan na tanggapon na sana na dae makakaatendir huli sa iyo ini an buhay sa akademya; siring man na dapat may makusog na mentalidad, maghanap nin mga amigo na mapagkakatiwalaan asin susuportaran sa pinakahababang punto nin buhay sa laog kan akademya, asin pinakaimportante an mangadyi.
Saro sa saiyang pikananudan sa laog kan akademya an mapadapit sa leadership na naghubog sa saiyang pagkatawo ngunyan.
Bilang sarong Philippine Coast Guard scholar, mapasiring si Trilles sa Bataan nganing mag-training asin maadal giraray.
Mensahe kaini sa aspiring PMMA-applicant na dae matakot na magpalyar; alagad kun magpalyar man an makanuod na adalan kun ano an sala asin maghanap nin paagi nganing magin matrayumpo o makapasar, dae mawaran nin paglaom asin mangadyi.
