Dismayado an grupo kan mga nasa sector nin transportasyon, kabale na an mga jeepney driver asin operator, sa programang inaprobaran kan presidente sa tahaw kan krisis sa gasolina.
Kinuwestyon ni Orlando Marquez, lider kan League of Transportation and Operators of the Philippines (LTOP), an ilulunsar na fuel subsidy kan gobyerno para sa PUVs o Public Utility Vehicles.
Poon kaya sa petsa 15 ngonian na bulan nin Abril, P10 an diskwento kan mga drayber sa kada litro nin gasolina na saindang gagamiton sa pagpapasada.
Alagad, nanindugan si Orlando Marquez na kulang na kulang ini asin bako bastante sa saindang pangangaipuhan, urog nang dakula na an paglangkaw kan presyo kan mga produktong petrolyo.
Sinabi pa kaini na nagreklamo sinda ki Presidente Ferdinand ‘Bongbong’ Marcos Jr. dapit sa saiyang pagbawi kan pag-aprobar kan fare increase sa mga pampublikong jeep.
Kun kaya nakikipaglaban asin nangangapudan an grupo na taasan nin maski piso an pamasahe huli ta nagdoble na ngonian an presyo kan krudo.
Huli kaini, dae malikayan ni Marquez na ihiras an saiyang agrangay sa presidente kan magtao ini nin 10-peso na diskwento kontra sa 100-peso kada litro nin gasolina.
Nagtutubod suboot siya na katampad kan pambakal nin kadugangang bagas asin pagkakan na dadarahon sa harong kan saindang pamilya an pisong dagdag sa pamasahe.
