LEGAZPI CITY – Nagpuon na an pagpapa-enroll kan mga magurang sa saindang mga aki sa Taysan Elementary School sa ciudad kan Legazpi.
Segun sa principal kan nasabing eskwelahan na si Manel Añasco sa intrevista kan Bombo Radyo Legazpi na nasa 1, 527 na mga estudyante an pinaglalaoman ninda na magpapa enroll para sa School Year 2024-2025.
An nasabing numero an puon Kindergarten hasta Grade 6.
Sinabi kan opisyal na nagdesignar man sinda nin mga paratukdo na mamamayo sa nasabing enrollment period ngani na magin organisado an gabos.
Alagad sinabi ni Añasco na dakulang angat ngunyan sa nasabing eskwelahan an kakulangan nin nasa 24 mga classrooms kaya naga-adaptar na sana nin mga emergency classes.
Huli digdi, pigbabanga an mga klase ngani na mataparan an pangangaipo sa pagkanuod kan mga estudyante.
Naipaabot na man suboot sa mga mas haralangkaw na opisyal an nasabing problema kaya nakapagpa repair nin nasa 12 mga classrooms alagad bako pa bastante sa pangangaipo kan mga kaakian.
