LEGAZPI CITY – Padagos an pigsasagibong monitoring kan Task Force Bantay Karne sa mga bakalan nin karneng orig sa syudad kan Tabaco sa provincia kan Albay.
Segun kay Jose Ernesto Ros, an Meat Inspection Officer kan Task Force Bantay Karne sa intrevista kan Bombo Radyo Legazpi na pigsasagibo an monitoring and enforcement nganing maipaotob an saindang mandato sa pagsyerto na nag-aagi sa tamang proseso an mga karne na pigpapabakal sa pribado asin pampublikong merkado.
Papahiguton man ninda an saindang pagbabantay nin huli ta diit na sanang aldaw an natatada bago sumapit an kapaskuhan asin bagong taon nganing matawan nin proteksyon an pagbakal kan publiko.
Sa presente, stable pa man suboot an supply kan karne asin kan bilang kan orig sa syudad kan tabaco kun kaya dae nahahandal an saindang opisina na magkakaigwa nin kakulangan sa mga ini.
Pigtawan doon man ni Ros na warang hurisdiksyon an saindang opisina na magdesisyon asin magdikta sa mga presyuhan kan karne sa syudad alagad ma-aasigurar kaini na babantayan ninda an sisay man na nagpapabakal nin mga overpriced na karne nganing matawan nin magkakanigong aksyon.
Mientrastanto, Wara pa man sinda nadadakop na nagbabalgar alagad dae man ninda pighahale an posibilidad na may malitaw na magpabakal kan mga bako malinig asin bako otorisado na karne lalo nang paparani na an aldaw kan kapaskuhan.
Base sa meat inspection code, pwedeng panimbagon kan ley an mga tawong bako otorisadong nagkakatay kan mga orig asin an mga tawong mapabakal kan karne kaini.
Pig abisuhan ni Ros an publiko na maging mapagmatyag sa pagbakal kan karne, hilingon kun an saindang stall igwang meat inspection certificate nin huli ta iyan an nagpapatunay na nag-agi sa tamang proseso an saindang pigtitinda kasabay an pangapodan kan saindang opisina sa mga may planong magkatay nin orig na ipakatay na sana an mga ini sa mga registered slaughter house nganing masyerto na malinig an saindang kakaunon ngunyan na pasko.
