LEGAZPI CITY- Susunadan na nin kasong pagbayolar sa Section 5 kan Acta Republika Numerado 9165 o Comprehensive Dangerous Drugs Act an sarong persona makalihis na maarestar sa isinagibong buy-bust operation kan pinagsarong puersa kan Philippine Drug Enforcement Agency (PDEA) Sorsogon, Albay asin Legazpi City Police sa Brgy. Orosite sa ciudad.
Binisto ining si Diogenes Callo mantang nakadulag man an duwa pang kaibanan kaini na sinda Arjay Hayagan asin an ipigkokonsiderar na provincial target kan Albay na si Christian Bobilles.
Sa intrevista kan Bombo Radyo Legazpi ki PDEA Sorsogon Provincial Officer Investigation Agent V Enrique Lucero, nagbalo si Bobilles na laugon an provincia kan Sorsogon sa transaksyon kan iligal na droga kun sain nakaolay an kakaluwas pa sanang inmate.
Alagad mawot naman na magbagong-buhay kan impormante kaya nakipagtabangan na sa mga otoridad tangarig na maarestar an nasabing persona.
Ikinasa an transaksyon sa ciudad kan Legazpi kun sain dara kan tulong suspek an poco mas o menos 50 gramo kan pigtutubudang shabu na may market value na P300,000.
Kan maghayag nang otoridad an mga katransaksyon, biglang kuminaripas nin dalagan an duwa asin si Callo na nagkua kan kwarta an nadakop.
Napag-araman man na nasa New Bilibid Prison an tugang ni Bobilles na pigtutubudang dakulang supplier kan iligal na droga.
Sa presente, nagtetenir na an naarestar na suspek sa custodial facility kan PDEA mantang kakasuhan man an duwa pang nakadulag.
