LEGAZPI CITY – Nasakote kan mga otoridad an duwang drug den sa magkasunod na drug buy-bust operation sa Barangay Oro Site, Legazpi City.
Segun ki Philippine Drug Enforcement Agency (PDEA) Bicol spokesperson Carlo Fernandez sa intrevista kan Bombo Radyo Legazpi na nadakop an sa operasyon an pitong drug personalities gabos an pigkokonsiderang mga high-value targets.
Kumpiskado man sa duwang drug den an poco mas o menos 25 gramos kan pigtutubudang shabu na may standard drug price na poco mas o menos P170,000 siring man an buy-bust money, drug paraphernalia, asin iba pang non-drug items.
Maugma man siya huli ta inabot sana nin sarong aldaw an nakuwa ninda an oportunidad na dakupon an mga suspetsado asin makumpiska an dakulang amunto kan ilegal na droga.
Nagpasalamat man an opisyal sa mga nakatabang nindang law enforcement agencies nganing masyerto na dae ini mabubulilyaso sa ibong kan nasa sarong barangay sana ginibo asin oras sana an pagultangan kan duwang operasyon.
Piglalaoman niya na sa paagi kan saindang trayumpo an mapipilayan an kalakaran kan ilegal na droga sa lugar asin nagpromesang dae sindang mapundo hangga’t dae ini napupugo.
Sa presente an mahahampang an suspetsado sa kasong pagbayolar sa Republic Act No. 9165 o an Comprehensive Dangerous Drugs Act of 2002.
Pagdoon pa ni Fernandez na magserbi ini na patanid sa mga naggagamit asin nagpapabakal kan ilegal na droga na dae nagpupundo an Philippine Drug Enforcement Agency asin iba pang law enforcement agencies nganing dakupon sinda asin panimbagon sa ley.
