LEGAZPI CITY – Inanunsyar kan Social Security System na magigin abilable na sa ciudad kan Legazpi an pighahalat na 3 year pension hike para sa mga retirado, may kapansanan, asin saindang mga benepisaryo.
Segun ki Social Security System spokesperson Jeanette Mapa sa intrevista kan Bombo Radyo Legazpi na mapoon an first tranch kan nasabing programa sa maabot na Setyembre sa presenteng taon na kun sain madadagdagan nin 10 % sa pensyon kan mga retirement disability pensioners, 5% dagdag sa pensiyon kan mga death o survivor pensioners.
An ikaduwang bugso man na 10% na dagdag pension sa Setyembre 2026 mantang sa Setyembre 2027 man an ikatulong bugso asin panibagong 10% increase kan nasabing programa.
Paglilinaw niya man na an mga pensyonado sagkod Agosto 31, 2027 sana an makaka-aprobitsar kan nasabing programa.
Pigsabi pa kan opisyal na naisakatupadan an programa huli sa haloy nang pangapodan kan saindang mga pensioners na magkaigwa nin increase asin nganing makatabang sinda sa epekto kan halangkaw na inflation.
Dae na man suboot kaipuhan mag-apply kan mga dati nang pensioners sa nasabing programa kundi automatic ining malaog sa saindang disbursement account kun kaya dae na kaipuhan na magpasiring sa sainda ofisina.
Pagirumdom kaini sa publiko na kun enkaso may kahapotan sa nasabing programa an dae magduwang isip na makipagkoordinar sa saindang social media pages asin regular na maghulog kan kontribusyon nganing permihang protektado an saindang sadiri asin pamilya.
