LEGAZPI CITY – Arestado na an lalaking suspek sa paggadan sa sarong daragita na pinagsasaksak asin inilaog sa sarong utility box sa Barangay Macabog, West District, Sorsogon City.
Segun kay Police Capt. Shirley Diocampo an tagapagtaram kan Sorsogon City Police Station, mismong an stepfather kan 22-anyos na biktima an may kagibohan kan krimen.
Enot kaini, nagreport sa hepatura kan pulisya an ina kan biktima makalihis na marekober an bangkay kan daragita na may mga tama nin saksak, napapatos nin tamong asin nakalaog sa utility box na pinatungan nin mga gamit.
Alagad sa pag-iimbestiga kan kapulisan, nadiskubre na mismong an stepfather kan biktima an suspek sa krimen, base sa testimonya kan mga kapitbahay kaini.
Bako pang malinaw sa ngunyan kung ano an posibleng motibo kan suspek sa paggibo kan krimen.
Alagad napag-araman na dati ng natokhang an lalaki huli sa paggamit nin iligal na droga mantang nakainom ini nin alak kan mangyari an insidente.
Sa ngunyan nakakarsel na an suspetsado para sa magkakanigong disposisyon.
