LEGAZPI CITY — Idineklarar na an state of calamity sa ciudad kan Legazpi huli sa naglalangkaw na kaso kan rabies.
Sa intrevista kan Bombo Radyo Legazpi ki City Veterinarian Dr. Emannuel Estipona, inaprubahan sa Sangguniang Panglungsod an resolusyon ni Coun. Beth Dimaculangan na isairarom sa state of calamity an ciudad.
Ikinaogma man kan Legazpi City Veterinary Office an lakdang huli ta mababakunahan na an natatadang 14,500 dog population sa Legazpi.
Enot naman na nabakunahan an nasa 8,000 na mga ayam alagad naubusan na nin bakuna.
Afuera kaini, makakakua na suboot nin pondo tangarig maparahay an eksistidong rabies control program kasabay kan pagpapagibo nin dog pound sa sentro mismo kan ciudad.
Segun ki Estipona, nairehistro an limang kaso nin rabies sa mga barangay kan EM’s Barrio, Cabangan, Maoyod, Bogtong asin Taysan.
Naubusan sana supply nin rabies vaccine an oficina kun kaya may babakunahan pa sa Barangay Taysan.
Dugang pa ni Estipona na plano man na i-activate an bagong scheme na “No Contact Apprehension” kun sain ma-isyu na nin ticket sa mga dog owners asin ide-deputize naman an mga barangay officials asin purok president sa implementasyon.
Afuera sa ciudad kan Legazpi, enot namang nagsagibo nin kaparehong lakdang an ciudad kan Tabaco kan Abril huli sa nairehistrong walong kaso nin rabies.
