LEGAZPI CITY-Nagtutubod si House Speaker Martin Romualdez na napapanahon an direktiba ni President Bongbong Marcos na suspendihon an pag-aangkat kan bagas sa laog nin 60 na aldaw na mapoon sa September 1.
Obheto kan lakdang na protektahan an mga paraooma asin pagtatao nin pagkakataon ngani na malinya an mga prayoridad sa food security.
Dagdag pa niya na mas labi pa ini sa policy shift kundi pagtindog para sa mga magsasaka asin sarong patunay na dai mababayaan an mga ipigkukundusir na nagpapakakan sa mga Pilipino.
Iniladawan man ni Romualdez an desisyon kan Presidente na sarong solusyon sa mga agrangay kan mga paraooma asin agriculture stakeholders na nangangapudan nin tabang laban sa baratong imported na bagas na nakakaapektar sa presyo kan mga lokal na paroy.
Magsisirbing opurtunidad an duwang bulan na suspensyon ngani maitaguyod asin pakusugon an pundasyon kan domestic rice industry.
Ipighayag man niya na haloy nang nagtitios an mga paraooma asin kada panahon kan ani, nagdadakol an mga imported na bagas asin dinodomina an merkado.
Pighikayat man kan opisyal na an mga ahensiya kan gobiyerno na gamiton an suspension period ngani mahabol asin mapanagot an mga nasa likod kan hoarding, price manipulation asin iba pang mapang-abusong transaksyon na nakakaapektar sa mga paraooma asin consumers.
