LEGAZPI CITY- Naging maogma asin matrayumpo an ginibong selebrasyon kan world teacher’s day kan mga paratukdo sa Sorsogon City kun saen nagpili sinda nin 10 outstanding teachers sa school division kan nasabing syudad.
Segun kay Jose Doncillo, an Sorsogon City School Superintendent sa intrevista kan Bombo Radyo Legazpi, kan nakalihis na miyerkules, Oktobre 3 pigsagibo an ika duwang taon na teachers Gala sa Sorsogon City kun saen sinabay an pag award sa napiling 10 na outstanding teachers sa saindang Division.
Segun pa sa opisyal kan nakalihis na taon nagpili man sinda nin 10 inspiring teachers kun saen nakaresibe man nin insentibo gikan sa saindang mga partner stakeholders.
Ngunian na taon, nakapag-uli nin 20,000 pesos ana napiling Most Outstanding Teacher asin may kasabay pang plaque, mantang nakaresibi man nin 15, 000 pesos an 2nd Most Outstanding teacher asin plaque, asin an iba pang natada an nakapag uli nin tig 10,000 pesos asin plaque.
Dugang kaini, nagtao man an lokal na gobyerno kan Sorsogon City nin tig 10 klos nin bagas sa nasa dos mil na mga paratukdo sa pribado man asin pampublikong eskwelahan sa syudad kan Sorsogon.
Huli digdi, dakula an naging pasasalamat kan opisyal sa gabos na nagtataong suporta sa mga paratukdo lalo na ngunian na selebrasyon kan National Teacher’s Month asin World Teacher’s Day.
Sinabi kaini kun gurano kaimportante an teaching profession asin an pagrekognisar sa dedikasyon kan mga paratukdo sa bilog na kinaban.
