LEGAZPI CITY-Pupunan na an soft launching kan Pantao port sa Libon Albay ngunian na Setyembre basado sa naging meeting kan mga concern agencies kan probinsya kan Albay.
Napagdesisyunan na sa maabot na Setyembre 2 ngunian na taon an gigibuhon na soft launching kan nasabing pantalan kun saen nakapag comply na an Probinsya kan mga kinakaipuhan na rekisitos antes an pormal na operasyon kan pantalan.
Segun kay Arnold Onrubia, an Head kan Albay Provincial Planning and Development Office, sa ngunian solamente mga cargoes sana an pwedeng maakomodir sa Pantao port asin padiit diit na bubukasan magin sa mga pasahero.
Ini man suboot an magseserbing gate way pasiring Visayas asin Mindanao.
Pigklaro kan opisyal na nagkaigwa lang nin diit na pagka pindyente sa pagbubukas kan pantalan huli suboot sa nabugtakan pa sana ini nin kuryente kan Albay electric Cooperative.
Para man sa seguridad, igwa naman suboot sindang mga kinua na license security personnel mantang makikipag koordinar man sinda sa host barangay asin sa PNP para man sa gigibuhon na soft launching.
Mientrastanto, segun sa opisyal na kabale an Pantao port sa Regional Development Plan kan Bicol Region kun saen piglalaoman na makakadugang ini sa revenue kan Probinsya.
