LEGAZPI CITY—Nagmamawot an sarong transport group na maitao na kan gobierno an magkakanigong asistensya sa mga apektadong operator asin driver sa tahaw kan nagpapadagos na krisis sa langis.
Segun ki Alliance of Concerned Transport Organization National President Liberty de Luna, sa intrevista kan Bombo Radyo Legazpi, kabale sa saindang pigpangapudan an pagtatao nin ayuda, service contracting, asin fuel subsidy.
Naglalaom man an grupo na magbaba an buwis sa excise tax kan diesel asin gas huli sa ini an saro sa mga pangenot na piggagamit kan mga operator, driver magin kan mga pribadong sektor.
Mientrastanto, nangangapudan man si de Luna nin despensa sa dae pag-atendir sa mga ikinasar na transport strikes kan ibang transport groups huli sa habo niya na maglala pa an sitwasyon asin kahagadan ninda an pagrespeto sa saindang nagin desisyon. Alagad tinawan-doon man niya na direchos man ini kan mga manlain-laing grupo na iluwas an saindang mga agrangay.
Nagmamawot man an opisyal na masabutan sinda kan mga pasahero en kaso na maghalangkaw an pamasahe huli sa naghihingalo na suboot an sektor kan transport sa bilog na nacion.
