Nagpirma an Pilipinas asin Australia nin Defense Cooperation Arrangement (DCA) na nagtutuyong parikason an military coordination asin disaster response, tanganing mas marikas na makatabang an pwersa kan Australia sa nacion durante nin mga emerhensya.
Segun ki Defense Secretary Gilberto Teodoro Jr., an kasunduan makakabawas sa bureaucratic procedures sa paagi nin pagpapasimple kan coordination process, partikularmente sa pagresponde sa mga kalamidad.
Ipinaliwanag man ni Teodoro na mas magigin marikas an pagtrabaho kan duwang nasyon asin magigin mekanismo an DCA para sa pag-implementar kan Status of Forces Agreement.
Dugang pa niya, dai na kaipuhan na magkua nin kadakol na permit ta isasararo na lang sa sarong proseso tanganing tulos na makaresponde an mga Australian allies durante nin emerhensya.
Piglalaoman man na mapapadali kan kasunduan an kooperasyon sa national defense, military hardware procurement, asin joint military exercises na kabali an air, naval, asin land forces kan duwang nasyon.
Pinirmahan ni Teodoro asin ni Australian Ambassador to the Philippines Marc Innes-Brown an DCA sa sarong seremonya na sinaksihan ni Australian Prime Minister Anthony Albanese sa Eva Macapagal Cruise Terminal, Pier 15, Manila South Harbor, antes an ika-49 na Association of Southeast Asian Nations (ASEAN) Summit.
