Legazpi City- Pigdistribwer na kan Albay Provincial Social Welfare and Development Office an mga social pension kan mga senior citizen sa probinsya sa paagi kan saindang programa.
Segun kay Ma. Vivien Cea, an head kan Albay PSWDO sa intrevista kan Bombo Radyo Legazpi na padagos na an pagdistribwer kan pension nganing maubos an 18 local governemnt unit hasta sa december 14.
Saindang pig-enot an isla kan tiwi sa pagpanao nin pension kan nakaaging bulan asin sinundan kan mga nagkataradang syudad asin munisipalidad sa Albay.
Base sa saindang datos na dae mababa sa 16,500 na mga senior citizen an mabebenipisyuhan kan pension distribution sa enterong probinsya asin mareresibe ninda an saindang stipend sa bulan nin July hasta December 2024.
Pigtaram man ni Cea na masagibo na man sinda nin payout kapag weekend nganing mas lalong maparikas an pagpay-out kan mga albayanong senior citizen.
Advance christmas gift na suboot ini para sa mga senior citizen nin huli ta pwede na ninda ini bakalon kan saindang pagkaon sa urualdaw asin pang bakal kan saindang maintenance.
Pigsyerto kaini na saro lang ini sa mga ayuda na pig-aalokar para sa mga senior citizen asin malaan an probinsya nin magkakanigong pondo nganing maipadagos ini sa mga masunod pang panahon.
