LEGAZPI CITY – Balik na sa normal an sitwasyon sa ciudad nin Masbate makalihis an naeksperyensyahan na makusog na pag-uran asin duros nin paros dara kan Bagyong Aghon.
Segun kay Isaias Bigol an head kan Masbate City Disaster Risk Reduction Management Office, nakauli na sa saindang mga harong an pina-ibakwar na mga residentes na nakaistar harani sa flashflood asin landslide prone areas.
Base man sa paglilibot kan MDRRMO wara nin naireport na casualty sa ciudad asin salbado an gabos na mga residentes.
Sarong harong sana an naireport na nadanyaran makalihis na mabagsakan nin puon nin mangga na tuminumba huli sa makusog na paros.
Segun kay Bigol, tulos na nagsagibo nin clearing operations an saindang team ngani na mahali an buminagsak na puon asin pinakaray an tuminagilid na poste.
Mientras tanto, ipinagpapasalamat man ni Bigol na huli sa pag-uran na dara kan bagyo liwat ng natubigan an mga tanoman kan mga paraoma na dating namomroblema sa sobrang init nin panahon.
