LEGAZPI CITY – Maikokonsidera kan sarong political analyst na bako sarong dakulang hiro protesta an nangyari kan nakaaging aldaw sa manlain-laing parte kan nacion kundi sarong rally sana na may manlain-lain na motibo.
Segun ki Atty. Michael Henry Yusingco sa intrevista kan Bombo Radyo Legazpi na haros gabos na hiro protesta an may obhetong ikondena an nangyayaring korapsyon sa gobierno alagad an iba sa mga ini an may obhetong anti-corruption na may anti-BBM na may pro-Duterte mantang may anti-Duterte asin anti-marcos na protesta.
Alagad sa ibong kaini an mas magayon suboot na dakol an mga namamanwaan na nakisumaro huli ta nagpapahiling ini na igwa sindang paki-aram asin dagit sa sistema kan gobierno kun kaya pigluluwas ninda ini sa paagi kan pakikisumaro sa mga rally.
Pagdoon niya man na kun masusutenir an mahiwasang protesta an posibleng maapektaran an mga pinangaranan nindang mga pulitiko alagad dae ini maisasakatupadan kun sarong aldaw sanang rally an isasagibo maski dakol pa an makisumaro.
Pigtaram pa kan naunambitang political analyst na kun mala-EDSA uno asin dos an klase kan mga sunod sunod na mga paghiro kan namamanwaan asin pagkurahaw nin nagkakasararong pangapodan an pwedesir na mapabago kaini an sistema kan pulitika sa national asin local level.
Sa presenteng estado an dae niya nahihiling na sasapiton kan Pilipinas an nangyaring karirirbukan sa mga nacion kan Indonesia asin Nepal huli ta dae man matitinag an mga tiwaling pulitiko sa sarong aldaw na dae man nagkakasararo na hiro protesta.
Masasabi niya man na masyado nang komportable an mga dynastic politician na nasa Kongreso an na-hijack o na-master na suboot an budget process kun sain eksperto na sinda sa pandarambong maski anong protesta pa an satuyang gibuhon.
Kun talagang dae suboot mapababa kan publiko an mga tiwaling pulitiko sa paagi kan mahiwasang hiro protesta, an suhestyon ni Yusingco iyo an palitan sinda sa paagi kan dae pagboto sainda nganing mapalitan nin mga representante kan komunidad asin bako hale sa mga political dynasties.
