Isinumiter na kan Senate Blue Ribbon Committee sa Office of the Ombudsman an imbestigasyon sa suboot anomalya sa flood control projects.
Obheto kaini na maparikas an imbestigasyon asin maibitaran an pagdoble kan mga isinasagibong proseso.
Segun ki Blue Ribbon Committee Chairman Senator Erwin Tulfo, napag-olayan ninda ni Senate President Sherwin Gatchalian asin Ombudsman Jesus Crispin Remulla na an Ombudsman na sana an pangengenot sa mga isyu na may kinaaraman sa flood control projects.
Marurumduman na nagkaigwa nin meeting an tulo kan Biyernes sa opisina kan Ombudsman sa Quezon City.
Sinabi ni Tulfo na nagpuon na man na gamiton kan Ombudsman an mga dokumentong isinumiter kan Independent Commission for Infrastructure.
Kaibanan sa mga pig-iimbestigaran an nagkapirang kongresista, contractors, government officials, nagkapirang senador asin iba pang haralangkaw na opisyal kan gobierno.
Segun ki Tulfo na padagos na naga usad an imbestigasyon kan Ombudsman.
Huli digdi, sinabi niya na dae na kaipuhan na makiaram pa kan Blue Ribbon Committee sa parehong isyu ngani na dae maapektaran an proseso kan imbestigasyon.
