LEGAZPI CITY-Magdedesisyun ngonian na Lunes Hulyo 20, an Senate impeachment court kun tutugutan an mosyon kan prosekusyon na magpaluwas nin subpoena pra sa bank asin tax records ni Vice President Sara Duterte asin saiyang agom na si Atty. Manases Carpio.
Segun sa impeachment court, pag-aadalan muna kan senator-judges an mosyon makalihis madango an kampo kan prosekusyon asin depensa.
Sa isinagibong caucus kan Biyernes, tinalakay kan mga senador an kahagadan kan prosekusyon, mantang sinabi ni Impeachment Court Presiding Officer Francis Escudero na kaipuhan pa ining mabusisi huli ta dai pa gabos kan senador an natatapos basahon an mga memorandum na isinumiter kan duwang kampo.
Segun kay Senate Impeachment Court Spokesperson Atty. Reginald Tongol, an mga senador sana na maatendir sa sesyon an makaboboto sa mosyon.
Sinabi pa kaini na kaipuhan na dai mababa sa 11 boto kan senado, ngani maipasar an nasabing mosyon.
Mientras tanto, naglalaom an House prosecution team na tatawanan kan impeachment court an saindang kahagadan.
Segun kay Atty. Benjamin Tolosa Jr., tagapagtaram kan prosecution panel, matibay suboot an saindang basehan na maisumiter an mga dokumento.
Nanindugan man siya na an impeachment proceedings kabilang sa mga exceptions sa bank secrecy laws, kaya posible suboot hagadon an nasabing mga rekord bilang parte kan paglilitis.
