LEGAZPI CITY – Nagtutubod an sarong senador na bako pa pinal an pag-archive kan senado sa impeachment complaint laban kay Vice President Sara Duterte.
Segun ki Senator Kiko Pangilinan sa intrevista kan Bombo Radyo Legazpi na dae pa ini nareresolba huli ta may isinunad pa na motion for re-consideration an House of Representatives sa nagin ruling kan Supreme Court.
Punto niya man na dae dapat nagdesisyon an mga senador sa articles of impeachment parte man kan senate impeachment court o maski senado sana huli ta may motion for re-consideration pa.
Pagsaladawan niya na dapat an Senate Impeachment Court an nagmamaneho huli ta igwa ining hurisdiksyon manungod sa trial asin magdesisyon sa kaso alagad inagaw an manibela huli sana sa desisyon kan Korte Suprema.
Pagbuyagyag pa kan Senador na ginibo kan Korte na void an kaso alagad sala an mga datos asin impormasyon na ipigbugtak kun kaya dapat na hinalat na sana an motion for re-consideration na ipigsunad kan House.
Opinyon niya man na posibleng baguhon kan halangkaw na hukuman an saindang desisyon huli ta bako man sinda mga diyos na dae na ayuson an saindang sala na nagibo.
Pagdoon niya pa na ngata magigin barred o void an tulong naenot na impeachment complaint sa pang-apat alagad kun hihilingon an mas naenot pa nindang tawan nin desisyon an pang-apat na complaint kompara sa mga naenot.
Kun kaya nagtutubod si Senator Pangilinan na dapat magkaigwa nin pagpapakarhay sa gabos na mga sala sa desisyon asin magkaigwa nin epekto an saindang kapangyarihan huli ta dae sinda nagsusuway sa korte suprema kun kaya magdesisyon man sinda na dae nagbabasa sa salang impormasyon.
