LEGAZPI CITY-Inanunsyo kan Schools Division of Legazpi na magsasagibo sinda nin Student Leaders’ Convergence sa maabot na Nobyembre 12-15, 2026.
Segun ki Spokesperson SDO Legazpi Santi Araña, sa intrevista kan Bombo Radyo Legazpi na basado ini sa Division Memo No. 0785 sa Legazpi kun sain magkakaigwa nin convergence an mga kaakian.
Pinaglalaoman na maabot sa 500 student leaders an maatendir digdi na isasagibo sa Ibalong Center for Recreation sa ciudad kan Legazpi.
Pigsasagibo suboot ini ngani mas mapauswag an values kan mga aki mapadapit sa serbisyo asin sa pagigin lideres, ngani magtalubo nin marhay na sosyedado sa saindang komunidad.
Kabale digdi an gabos na pampubliko asin pribadong eskwelahan sa ciudad kan Legazpi kun sain magpapadara sinda nin mga delegado para sa nasabing event.
Digdi magkakaigwa sinda nin mga training asin iba pang mga aktibidad.
Taon-taon ining pigsasagibo ngani magkaigwa nin bastanteng kaaraman an mga joven sa amay na edad manungod sa pagigin sarong marhay na lider.
Pangapudan man kan opisyal sa mga eskwelahan na aprobitsaran ini asin makisumaro para sa papaabot na aktibidad.
