LEGAZPI CITY—Nakalinyada na an mga aktibidades kan Schools Division Office Albay mapadapit sa selebrasyon kan National Teachers’ Month ngunyan na taon.
Segun ki Schools Division Office Albay Spokesperson Froilan Tena, sa intrevista kan Bombo Radyo Legazpi, nakapaluwas na sinda nin mga paisi asin memorandum mapadapit sa aktibidad asin sa presente nagpapadagos sinda sa mga simpleng selebrasyon sa mga eskwelahan sa provincia.
Mangyayari man sa Oktubre 3 an pinaka-highlight kan selebrasyon kun saen piglalaoman na ma-atendir an mga lokal na opisyal kan sektor kan edukasyon sa Albay.
Afuera digdi igwa man na selebrasyon sa kanya-kanyang lambang distrito asin mga eskwelahan katakod kan teachers’ month.
Saro man sa magigin aktibidad an an paghahanap sa most inspiring stories kan mga paratukdo.
Dugang ni Tena, an magigin tema kan selebrasyon an “Festival of Festival” kun saen magkakaigwa nin street dance, contests, King and Queen, magin misa na aatendiran kan mga partisipante gikan sa manlaen-laeng munisipalidad kan Albay.
Mientrastanto, sinabi pa kan opisyal na magayon na igwang may ipigseselebrar na Teachers’ Month asin teachers’ day huli sa natatawan nin honra asin pagbisto an mga paratukdo asin natatawan nin selebrasyon an saindang kapagalan, trabaho, asin resulta kan saindang pigtatrabahuhan.
