LEGAZPI CITY – Nakatalaan maghatod nin tabang an sarong student organization kan Bicol University partikulamente na sa provincia kan Masbate na labing naapektaran kan hagupit ni Bagyong Opong.
Segun ki BU Lawod President Kobe Sampaga sa intrevista kan Bombo Radyo Legazpi na mawot nindang makapagtao nin tabang sa saindang kababayan huli ta an saindang organisasyon an kompwesto kan mga estudyante na gikan sa Masbate, Ticao asin Burias Island na nagka-klase sa naunambitang unibersidad.
Nakaguno sinda nin kwarta na hale sa mga may indibidwan na may marhay na boot na nagdonar, nakapagsagibo man sinda nin donation drive kun sain nakalikom man sinda nin maabot sa 170 relief packs mantang nagkondusir man sinda nin food assistance para sa mga Bueñong Masbateñong estudyante huli ta kadaklan sa sainda an dae ma-contact an saindang pamilya para sa saindang budget sa mga masunod na semana.
Paghistorya man ni BU Lawod Vice President for external Affiars John Nicole Bolon na bako ini an enot na bes na nagkondusir sinda nin kaparehong inisyatiba huli ta kan kasagsagan kan Bagyong Kristine kan nakaaging taon an nagsagibo sinda nin relief packing operation sa ibong kan bako pa dakol an suportang nareresibi ninda.
Pagsyerto man ninda na makaka-abot sa manlain-laing lugar kan provincia kan Masbate an mga ipigdonar na tabang sa saindang organisasyon mantang nakikipagkoordinar na man sinda sa mga grupo sa provincia nganing magin tulay sa saindang inisyatiba para sa saindang kababayan.
Punto pa ni Bolon na mantang nagdadakol an mga nagdodonar sa saindang grupo an mas nagdadakula an mga lugar sa Masbate an naaabotan ninda nin tabang kun kaya padagos an saindang pakikipagkoordinar sa ground nganing mapalawig pa an saindang pagtatao nin tabang.
Nauugma sinda huli ta pigkakatiwalaan sinda kan saindang mga donors asin sponsors na nagpapahiling man kan saindang obheto na matabangan na maka-recover an mga kababayan nindang Masbateño kun kaya nagpapasalamat sinda sa mga warang patod na nagpapadara sainda nin donasyon.
Pangapodan ni Sampaga asin Bolon na dae magduwang isip na magdonar sa saindang organisasyon nganing makatabang sa saindang mga kababayang naapektaran kan Bagyong Opong asin regular man nindang pig-u-update an saindang datos manungod sa mga report asin acknowledgements nganing mamantenir an transparency asin aram kan publiko kun sain napapaduman an saindang ipigdonar.
