LEGAZPI CITY – Nadukayan an sarong pigtutubudang Chinese submarine drone sa kadagatang sakop kan San Pascual, Masbate.
Segun kay Police Regional Office (PRO) Bicol Director BGen. Andre Dizon sa intrevista kan Bombo Radyo Legazpi na nahiling kang duwang parasisira mantang nasa laot asin tulos na pigtaram sa mga otoridad nganing makuwa an nasabing drone.
Pigladawan kaini na gare siya rocket na may duwang parikpik asin nagpapataw pataw sa dagat.
Igwa suboot ining markings na “HY 119” asin base sa saindang open source research na saro ining underwater navigation and communication system kan China.
Pigdugang pa ni Dizon na pira sa gamit kan device an underwater surveillance, oceanographic research, naval operations asin pweding magamit suboot bilang anti-detection device.
Sa presente, naiturn over na kan PRO V sa Philippine Navy an drone nganing magsagibo nin magkakanigong imbestigasyon.
Pagirumdom kaini sa publiko na tulos isumbong sa mga kinaookolan kun may nahiling man sa mga kadagatan na mga kahina-hinalang mga gamit na nagpapataw pataw asin mag ingat sa pagkapot kan mga ini ta baka may posibilidad na magsabog ini.
