LEGAZPI CITY – Arestado ang sarong konsehal sa ipigkasar na sarong drug-buy bust operation kang pinagsarong pwersa kan operatiba kan Philippine National Police (PNP) asin kang Philippine Drug Enforcement Agency o PDEA Virac sa Virac Town Center Parking Area, Brgy. San Roque, Virac, Catanduanes.
Segun ki PMAJ Emsol Icawat, hepe kang Virac Municipal Police Station sa intrevista kang Bombo Radyo Legazpi, ang suspek na pinagbisto sa alyas ‘Ric’, 53 anyos asin presenteng barangay kagawad sa sarong barangay sa munisipyo kan Pandan sa kaparehong probinsya asin
maabot sa sarong bulan na suboot ining pinagmamanmanan kang kapulisan.
Nakumpiskar sa pag-iingat kan suspek ang tulong heat-sealed transparent plastic sachet na igwang laog nin pinagtutubududang shabu na nagkakantidad nin maabot sa 102-K pesos.
Segun pa sa opisyal, padagos man suboot ang saindang kampanya kontra iligal na droga, partikularmente na sa mga Barangay Anti-illegal Drugs Campaign na mangenot sa pagsugpo kan iligal na kalakaran.
Sa presente nagtetenir na ang naunambitang suspek sa kustodiya kang Virac Municipal Police Station asin nakatalaang masangatan nin magkakanigong kasong pagbalgar sa RA 9165 o ang Comprehensive Dangerous Drugs Act of 2002.
