LEGAZPI CITY – Gadan an sarong indibidwal mantang irido an tulong iba pa sa nangyaring salpukan kan duwang motorsiklo asin sarong private utility vehicle sa kahalabaan kan Maharlika Highway na sakop kan Barangay Abuyog, Sorsogon City.
Segun ki Sorsogon City Police Station Chief of Police Police Lieutenant Colonel Christopher Aduviso sa intrevista kan Bombo Radyo Legazpi na basado sa saindang inisyal na imbestigasyon, nahagip kan private utility vehicle an duwang motorsiklo makalihis na magliko sa ibong na direksyon.
Makalihis man suboot na mangyari an insidente, nawaran nin control an pribadong behikulo na nagresulta man sa pagkakahulog kaini sa sarong omahan.
Napag-araman na hale sa Manila asin pasiring kuta sa provincia kan Samar an nanunambitang behikulo mantang residente man kan ciudad an nagadan na motorista.
Suspetya pa kan opisyal na huli ta straight asin dakula an kakalsadahang pinangyarihan kan insidente, pwedesir na ini an rason kun nyata marikas an pagpapadalagan kan nagkapira kan saindang mga behikulo alagad dae man ninda pighahale an posibilidad na pirut an driver kan private utility vehicle.
Enkasong mapatunayan an may sala sa nangyaring aksidente, pwedesir ining mahampang sa kasong reckless imprudence resulting to homicide.
Pangapodan man ni Aduviso sa mga naglo-long rides na dae na pagpiriton an sadiri sa pagmamaneho urog na kun pirut na asin ibitaran an pagdukot sa mga kasunudang behikulo nganing malikayan an siring kaining insidente.
